թև տակ առնել

Վիքիբառարան-ից
Jump to navigation Jump to search

Հայերեն դարձվածք

  1. մի բանի վրա տարածվել՝ փռվել ◆ Ու անեն ինչ խորին գիշեր / Իր սև թևի տակ առավ։ Դերենիկ Դեմիրճյան ◆ Դաշտ ու անտառ, / Գետ ու գետակ, / Այս ամենը / Առ թևիդ տակ։ ԱթԽ
  2. իր խնամքի՝ հոգածության տակ վերցնել ◆ Ուստա Օնիկը «Ավետիսի եթիմին [«որբին»]․․․ «հալալ ախպոր նման թևի տակ էր առել»։ (Խաժակ Գյուլնազարյան) ◆ Գուրգուրում էր նոր թև բացող գրական կադրերին, առնում թևի տակ։ Աղավնի ◆ Իր երեք կիներն ու երկու աղջիկները թևին տակ առած, կ'ապրեր խաղաղությամբ։ Աշոտ Հովհաննիսյան ◆ Ծով ա՛չք․․․ / Ա՜ռ քո թևին ներքևն, պինդ պահե պահե՛ զիս․ / Մազովդ սրբե՛ զքրտունքն [ըզքըրտունքըն] ճակտիս։ ◆ Աչքը երկինքը կթել՝ որ ռուսաց հզոր արծիվը գա ու իրանց հողն ու զավակը իր թևի տակովն անի։ (Խաչատուր Աբովյան) ◆ Հյուսիսի բերնիցը սկսած նրանց հոգսը քաշել, նրանց իր թևի տակն էր ուզում բերի։
  3. (թևերի տակ առնել, թևի տակ ընդունել) իր հովանավորության՝ պաշտպանության տակ վերցնել ◆ - Մենք նրան պետք է թև ու թիկունք լինենք, հավաքվենք նրա թևի տակ, նրան էլ առնենք մեր թևի տակ։ (Նաիրի Զարյան) ◆ Անգլիա ևս դարերով իր թևերուն տակ առավ Եվրոպայի այդ Հիվանդ Մարդը (Թուրքիան)։ «Նաիրի» ◆ Ծնկի կիջնենք և աղերսելով կխնդրենք ձեր լուսապայծառ թագավորին, որ շնորհ անի ընդունել իր թևի տակ մեր երկիրն ու ժողովրդին։ Վալտեր Արամյան
  4. տիրել ◆ «Որքան էլ մեծ լինի գրողը․․․ թեկուզ գլուխը երկինք հասնի ու աշխարհն առնի թևի տակ, ունի մի հող և այս հողը հայրենի երկիրն է, որի վրա պետք է ամուր կանգնած լինի»։ Հովհաննես Թումանյան

Աղբյուրներ[խմբագրել]

  1. Պետրոս Սարգսի Բեդիրյան, Հայերեն դարձվածքների ընդարձակ բացատրական բառարան, Երևան, «Երևանի Պետական Համալսարանի Հրատարակչություն», 2011։