մի կողմ դնել

Վիքիբառարան-ից
Jump to navigation Jump to search

Հայերեն դարձվածք

  1. հրաժարվել (միառժամանակ) ◆ Արտակը զգաց, որ դեռ սակավ էր մի կողմ դնելը իր սիրո զբոսիկ, անձնական երջանկության հետամուտ զգացմունքը։ Դերենիկ Դեմիրճյան ◆ Զապել վերջապես հպարտությունը մեկդի դրեր, և իրեն մոտեցեր էր։ ՀրԱս. ◆ Բացյ եկեք մի պահ մի կողմ դնենք սեփական անգերազանցելիության մեր համոզմունքը և սկզբից զինվոր դառանանք։ «Ավանգարդ» ◆ Դժբախտաբար... դբախտաբար... գրեթե բոլորը... հայրենիքի գաղափարը ծալլած մի կողմ դրած են: Թեք. ◆ Արի՛, քո քերականությւոն, ճարտասանությւոն, տրամաբանություն ծալի՛ր, ղրաղ դիր: (Խաչատուր Աբովյան)
  2. հաշվի չառնել, անտեսել ◆ Այդ ժամանակաշրջանում կառավարությունը մի կողմ էր դրել ներքին և արտաքին քաղաքականության բոլոր մնացած պրոբլեմները։ «ՍՀ» ◆ - Է՛, անուշի՛կս, իմ գործս ուրիշ է. ինծի մեկ կողմ դի՛ր։ Լևոն Շանթ ◆ Ընթերցողները ի՞նչ պիտի խորհեին մեր մասին, եթե այդ բազմաթիվ բաները մեկդի դրած, Եվրոպայի կարգ մը թերություններուն մասին միայն գրեինք։ «Զարթոնք» ◆ - Լուրջ բաների մասին խոսելիս շատ էլ բծախնդիր չպետք է լինինք քաղաքավարական կանոնները պահպանելու համար, ուստի ես էլ ծալում մի կողմ եմ դնում քաղաքավարական կանոնները։ Ն-Դ
  3. անուշադրության մատնել ◆ Փոխանակ դիմումի հետքերով գնալու, ծալեցին մի կողմ դրեցին:
  4. մոռացության տալ, մոռանալ (միառժամանակ) ◆ - Երբ մարդ որոշում է օդ բարձրանալ, պետք է մի կողմ դնի զգացմունքները։ ԱբԱվ. ◆ Նույնիսկ ապրուստի տարրական պետքերուն համար պիտի կռվիս շարունակ՝ ծրագիրներ ու բաղձանքներ բոլորը մեկդի դնելով: Լևոն Շանթ ◆ ինձ ոչ մի բան չէր մնում, եթե ոչ հորդորներս ու երազներս ծալել մի կողմը դնել և դեպքերը թողնել իրենց բնականոն ընթացքին։ Ն-Դ ◆ Էս օրութին դիփ ղ՝րաղ դնինք՝ ասկականութինն էլ, բարեկամութինն էլ, նախանձն էլ։ Սունդ.
  5. հետաձգել ◆ Առաջին բանը, որ անցնում է մտքովս, դա այն է որ, «կամաց մը» ծալեմ սկսված գրախոսականը և մի կողմ դնեմ: Գուրգեն Մահարի
  6. առանձնացնել ◆ Հեռավոր ճանապարհ մեկնելու պատրաստվող ամեն ոք դարձյալ ու դարձյալ ստուգում է իր հանդերձանքը, մի կողմ է դնում ավելորդ իրերը։ «ՍՀ»
  7. խնայել, տնտեսել ◆ - Աշխատավարձս բարձր է, նույնիսկ հաջողվում է որոշ գումար մի կողմ դնել: Պերճ Զեյթունցյան ◆ Տարին քանի մը հարյուր ղուրուշ ավելի մեկդի պիտի դներ: Արփ. ◆ Գյուղացին միշտ շռայլ եղած է և երբեք չէ փորձած ոսկի մը մեկ կողմ դնելու: Երվանդ Օտյան
  8. հանձն առնել (ծախսը) ◆ - Քանի մը տոլլար [դոլլար] մեկ կողմ դրի, բայց առողջությունս ինծի հետ չմնաց։ Վահե Հայկ ◆ Ղուկաս աղան ըրավ չըրավ մեճիտիե [մեջիդիե, «արծաթ դրամ»] մը մեկդի դրավ և օր մը հիվանդը Խորասանչիին [Խորասանջիին] տարավ։ Արփ.

Աղբյուրներ[խմբագրել]

  1. Պետրոս Սարգսի Բեդիրյան, Հայերեն դարձվածքների ընդարձակ բացատրական բառարան, Երևան, «Երևանի Պետական Համալսարանի Հրատարակչություն», 2011։