վաղը մյուս օրը էգուց-էլոր

Հայերեն դարձվածք

1. (արևմտհ․) (խսկց․) շուտով ◆ Վաղը մյուս օրը աշխատանքի կանցնեմ։ ◆ Եվ ձեր բաժինները՝ եթե վաղը չէ, մյուս օրը կկորցնեն իրենց արժեքները։ Հովհաննես Թումանյան ◆ - Վաղը մեկալ օրը գործերը կը բացվին, մարդդ ալ կ’աշխատտի, դուն ալ։ Զապել Եսայան ◆ - Էգուց ո՛չ էլօր Մեծ Պասը ոտները երդկիցը ճոլորակ կանի։ (Խաչատուր Աբովյան)
2. (մոտ) ապագայում ◆ - Էն որ էգուց-մյուս օրը սիրելու ես մեկին, տուն-տեղ դնես, էդ երա՞զ չի։ (Գուրգեն Բորյան) ◆ Կը կռահե թե իր մեջ բաներ մը կը փլին․․․ ու վաղը մյուս օր ով գիտե, ինչեր պիտի փլին։ ◆ Լիրբ խեղկատակներ, կեղծ ու կարճամիտ, Սրտերում դավեր, դեմքերին ժպիտ․․․ Որ չարչարվում են, խոսում են անդադար էգուց կամ էլօր մեռնելու համար։ Հովհաննես Թումանյան
3. ապագայում․ հետագայում ◆ Մեր ազգի երեխայիցն [«երեխաներին» էն լուսավորության դուռն բանալ, որ վաղն և մյուս օրն կարողանան մարդի միջու մարդ երևիլ։ Թաղիդյանց ◆ Մեզանից, մեր աշխատանքից է կախված, որ այսօր «թիկունքում կանգնողը» վաղը չդառնա «ուսին կանգնող» իսկ վաղը չէ մյուս օրը՝ հասարակության «մեջքին նստող»։ ◆ Վաղը կամ մյուս օրը Երևանը նորից ու նորից կհոլովվի աշխարհի բոլոր լեզուներով։ ◆ Կաւիկն ի բրուտն ասաց․ «Մի՛ դատիր ողորմ ու լալի, Վաղն ու մէկալ օրն, ասեմ, քո սուաթն «պատկերն» ի յիս հիս, «ինձ» նմանի» ◆ - Չէ՛, ասավ Մելիք, քու ամբողջ ազգով Անց պիտի կենաս իմ թըրի տակով, Որ էգուց-էլօր, ինչ էլ որ անեմ, ոչ մի սասունցի թուր չառնի իմ դեմ։ Հովհաննես Թումանյան
4. մոտերս, մոտ օրերին ◆ Վաղը, մյուս օր, այդ օտարոտի վարժարաններն դուրս եկող պատանիները․․․պիտի մերկանան իրենց հայու անունեն սկսելով մինչև իրենց լեզուն։ (Գրիգոր Զոհրապ) ◆ Կռիվները վաղը կամ մյուս օրը սկսիլը անմիջական անհրաժեշտություն մը չէ։ ◆ - Էգուց-էլօր մենք ձեր տունը համախոս ենք ղրկելու։ (Պերճ Պռոշյան) ◆ Էստու համա էլ մտկումս դրի, վուր էքուց յա էլօր մնաս բարով պատվական Փարիզ, ասեմ։ ◆ - Մնացող թո՛ մնա, էգուց մկլօր մեր ճժեր թո՛ էրթան պտուղ էնեն բերեն։ (Պերճ Պռոշյան)
5. ժամանակի ընթացքում ◆ Զավակները վաղը, մյուս օր կմեծանան և սեփական ինցիաթիվով կապրեն։ Եղիշե Չարենց ◆ «Կը կարգադրվի, ամեն ինչ կը կարգադրվի․․․ վաղը մյուս օր անոնք ալ, ես ալ, բոլորս ալ երջանիկ կ’ըլլանք անպայման։ ԱվԱլ․
6. (խսկց․) հետո ◆ Սրա հետ միասին հատկապես քեզ խորհուրդ կտայի պահել ընկերության մեջ ստացված թարգմանությունները նմուշները, թե չէ վաղը մյուս օրը աղմուկ կըհանեն։ Հովհաննես Թումանյան ◆ «Հիմա չվառեն, էգուց-մյուս օրը պիտի վառեն։ Ստեփան Զորյան
7. երբևէ ◆ Եթե վաղը, մյուս օր փորձեն ռազմական հեղաշրջանում կատարել․․․ կարող է հույսն ամբողջովին գվարդիայի վրա դնել։ «Հայաստանի Հանրապետություն» ◆ Էգուց-էլօր որ երես երեսի գանք․․․ ո՞նց եմ մտիկ տալու նրա երեսին։ Մաթևոս Դարբինյան

Աղբյուրներ

1. Պետրոս Սարգսի Բեդիրյան, Հայերեն դարձվածքների ընդարձակ բացատրական բառարան, Երևան, «Երևանի Պետական Համալսարանի Հրատարակչություն», 2011։