Աստված հետը

Հայերեն դարձվածք

1. Աստված օգնական լինի, պահպանի ◆ -Երթաս բարով, Աստված քեզ հետ, / Ոտքըդ քարի թող չըգա։ (Ավետիք Իսահակյան) ◆ Այդ ռիսկոտ գործում ալլահը թող նրա հոտ (լինի)։ ◆ -Դե՛, գնացե՛ք, գնացե՛ք, Աստված ձեզ հետ։ (Պերճ Պռոշյան) ◆ Ոչ մեկ վախ ունիմ թե չես հաջողիր և «Աստված հետդ» կ՚ըսեմ։ (Վահան Թեքեյան) ◆ Կ՚ելլես ատենին առջև, և այն ատեն... Աստված քեզի հետ։ Բայց չեմ կարծեր որ Աստծու կողմե միջամտություն մը ըլլա։ Անդրանիկ Ծառուկյան ◆ Փրկարար աղոթքի պես կրկնում եմ՝ թշնամու գնդակից հեռու մնաս, աստված քեզ հետ լինի։ Հ ◆ Է՞յ, երթաս բարով, Աստված հետդ ըլլա։ Արփ ◆ Խորհեցա որ որոշած էին ծածկել և գաղտնի պահել անոր մահը։ Անպատճառ Աստված հետս ըլլալու էր։ Աշոտ Հովհաննիսյան ◆ -Տերը հետն ըլլա։- Ճորճը [Ջորջը] իմ տղաս է։ Բենիամին Նուրիկյան ◆ -Երթաս բարով։ Տերը հետդ ըլլի, հարցնողաց բարևներս տաս։ Վահե Հայկ ◆ «Դե քյացեք, ծըեզ մըհար ապրեցեք, ծըեր Տերը ծըեզ հետ, սերը ամըեն պյանի կախտըի»։ ◆ -Դե՛... ես քեզանից բաժանվում եմ, Տերը քու ետնա, գնա՛։ Զաքար ◆ -Էլ մի ուշանալ, ամենահարմար ժամանակն է, Տէր ընդ քեզ։ (Պերճ Պռոշյան) ◆ Զգույշ եղեք, հա՜... Դե՛, երկինքը ձեզ հետ, գնացե՜ք։ (Վախթանգ Անանյան)
2. ինչ ուզում է՝ անի, իր գործն է, ինձ (մեզ) ի՞նչ ◆ Սակայն, Աստված իրենց հետ, մեզ մեր խնդիրներն են հետաքրքրում, մեր պատանդների ճակատագիրը։ «Հայաստանի Հանրապետություն» ◆ Եթե միայն քոնը լինեին, աստված քեզ հետ, ապրիր ինչպես կամենում ես։ Պերճ Զեյթունցյան ◆ -Ո՞վ ուր է ապրում, ինչո՞վ է զբաղվում, տերն իր հետ։ Մուշեղ Գալշոյան ◆ Մինչև անգամ ուրացել են յուր տված փողերը, ետ կանգնել, բայց Տերը նրանց հետ։ (Լեո) ◆ -Քեզի չենք սպանի։ Մտիր ձորը՝ պահվիր, գիշերը գնա քո ճամփով, ալլահը քեզ հետ։ (Մ․ Սարգսյան)
3. դեպքերը մեկի համար ինչպես որ դասավորվեն թող դասավորվեն ◆ Այստեղ մարդ եղար՝ եղար, չեղար՝ Աստված հետդ։ Անդրանիկ Ծառուկյան ◆ -Թե որ փուչ դուս էկար՝ աապած քեզի հետ, ասպած էլ՝ ինձի հետ։ (Մկրտիչ Արմեն)

Աղբյուրներ

1. Պետրոս Սարգսի Բեդիրյան, Հայերեն դարձվածքների ընդարձակ բացատրական բառարան, Երևան, «Երևանի Պետական Համալսարանի Հրատարակչություն», 2011։