աշխարհ գալ

Հայերեն դարձվածք

1. ծնվել ◆ Ինչպես որ մի օր աշխարհ է եկել, / Այնպես էլ անմեղ գնում է հիմա։ ՍԽար ◆ Ուշ աշխարհ եկած ըլլալը ինքնին արժեք մը չի ներկայացներ, մանավանդ անոնց քով, որոնց կը պարտինք մեր աշխարհ գալը: Անդրանիկ Ծառուկյան ◆ -Փորումս լակ ձու կտրվեիր, ջուր դառնայիր՝ աշխարհք չընկնեիր։ (Պերճ Պռոշյան) ◆ Կանգնեիր Մամոյի մի օր առաջ աշխարհ եկած դիմաքանդակի դեմ։ Գուրգեն Մահարի ◆ Նա էրկիր էկավ գարունքին։ Կարին
2. ծնվել-ապրել...կյանքում, պայմաններում ◆ - Այ խաբեբա, / Ահա ես էլ էդ եմ լալիս. / Ինչո՞ւ էս ձիրքն էիր տալիս։ / Չգիտեի՞ր միթե այնժամ, / Թե ինչ աշխարք պիտի ես գամ: Հովհաննես Թումանյան ◆ Կարծես աշխարհ եկած ենք անընդհատ պայքարելու, անընդհատ հուսաբեկ ըլլալու և անընդհատ տառապելու համար։ Վազգեն Շուշանյան
3. ((հզվդ․) դուրս գալ) հայտնվել, երևան գալ ◆ Մացակը նորից զգաց, որ աշխարհ է եկել ինչ-որ օտարոտի, անհասկանալի մի բան։ (Նաիրի Զարյան) ◆ Մի գայլ է աշխարհ եկել, մի շատ փորձված գայլ ու քանդում է մեր ապրուստը։ (Վախթանգ Անանյան) ◆ Կասկածը իսկույն ինձ վրա ընկավ. էդ դանակի պատմությունն էլ նորից աշխարհ է գալիս: Ռափայել Պատկանյան ◆ Կարծես փախուստ տված ըլլան անցած դարուն սահմաններեն ու վերսին դուրս գան աշխարհ, մեր դարուն մեջտեղը։ Անդրանիկ Ծառուկյան
4. ստեղծվել, առաջ գալ ◆ Հիմա ութսունամյա ձեռքերը գավաթներ են բարձրացրել ու շնորհավորում են Սասնա նորակազմ ընտանիքի աշխարհ գալը: «Ավանգարդ» ◆ Միացե՛ք, տաղեր, որ աշխարհ եկաք, / Հեռու իրարմե ատենով, տեղով։ Թեք. ◆ «Ինչ թագավորություն էլ աշխարհ գա, էդ արհեստը (դագաղագորխությունը) հա՛ կլինի»։ Սերո Խանզադյան

Աղբյուրներ

1. Պետրոս Սարգսի Բեդիրյան, Հայերեն դարձվածքների ընդարձակ բացատրական բառարան, Երևան, «Երևանի Պետական Համալսարանի Հրատարակչություն», 2011։