առյուծ կտրել

Վիքիբառարան-ից
Jump to navigation Jump to search

Հայերեն դարձվածք

  1. վիթխարի քաջությամբ տոգորվել, իրեն քաջի կեցվածք տալ (կռվի ևն, պատրաստ, առավ, հեգն) ◆ Իրենց կանանց փեշի տակ մտած ամուսինները հաճախ առյուծ են կտրում տղամարդկանց հավաքույթներում։ Ֆրանց Վերֆել ◆ Մեզ վրա էին ասլան կտրել։ Ա՜խ, ես դրանց արևը մարեմ։ Սերո Խանզադյան ◆ Իմ պատվական հայրս, որ տաճկի առաջին չնչին մկան նման սողում է, միևնույն սենեկում մի ժամ հառաջ առյուծ էր կտրված։ (Պերճ Պռոշյան) ◆ Դո՛ւք որ հուր ու կրակ մտած՝ / Սուրբ վրեժի առյուծ դարձած՝ / Մեր աշխարհքի պատվի սիրուն / կռիվ մտանք։ (Ավետիք Իսահակյան) ◆ Վախկոտ, թույլ, նախատված բոլորեն։ Որ առյուծ կը դառնար երբ ըլլար խմած։ Հակոբ Օշական ◆ Փախչո՞ւմ եք, կնիկմարդե՜ր․․․ մեզ վրա էին ասլան կտրել։ Սերո Խանզադյան ◆ Տասն - տասնըհինգ տարեկան տղերքն էլ ասլան էին դառել, ուզում էին իրանց արընի ջիգրը հանեն։ (Խաչատուր Աբովյան) ◆ Քել [ճաղատ] Նիկողոսին խես հերիֆ մը, վրա փչես՝ վրա կ'իյնա, ասլան դարձեր, թաթը դրեր է մեր ամենուս վրա։ Զապել Եսայան ◆ Իսկ ես առյուծի կերած եմ այլևս, սրահը ինծի հետ է և հաղթանակը անկարելի չէ։ Անդրանիկ Ծառուկյան
  2. գազազած վիճակ ունենալ ◆ Կրկին սանձերը թողած, ոչինչ չգիտակցող, գինուց մթագնած ուղեղով նա նորից «առյուծ» էր կտրել։ «ՍՀ» ◆ Այն ձեր ծառան Մարգարիտը ինծի հետ տեսնելու պես առյուծ կը կտրի և չթողուր [չը՛թողուր] որ խոսակցինք։ Հակոբ Պարոնյան ◆ Քույրը կը վախնար դալկահար, բարկացած, առյուծ դարձած սա երիտասարդեն, որուն աչքերուն նայող մը կը խրտչեր առաջին անգամ, ներսի կրակեն։

Աղբյուրներ[խմբագրել]

  1. Պետրոս Սարգսի Բեդիրյան, Հայերեն դարձվածքների ընդարձակ բացատրական բառարան, Երևան, «Երևանի Պետական Համալսարանի Հրատարակչություն», 2011։