գիշերը ցերեկին խառնել

Հայերեն դարձվածք

1. գիշերն անքուն անցկացնել, գիշերները մի բանով զբաղվել ◆ Տասը տարի էր Միքայելը գիշերը ցերեկ և ցերեկը գիշեր էր դարձրել։ Տուն էր գալիս գիշերվա երեք-չորս ժամից ոչ առաջ, քնում էր մինչև երեկո։ (Շիրվանզադե) ◆ Ես միշտ կ'ուտեմ, գիշերը ցերեկին խառնելով կ'ուտեմ։ Աշոտ Հովհաննիսյան ◆ Թորիկ Ղուկաս մյուս րենչպերներուն [րենչբերներուն] պես շատ զբաղած չէր։ Գիշերը ցորեկին խառնելու չափ գործ չուներ։ Համաստեղ ◆ Գիշերս-ցերեկս իրար խառնեցի չարաչար գործեցի։ Անդրանիկ Անդրէասեան ◆ Մեզ համար գիշերը դարձել էր ցերեկ, իսկ ցերեկը՝ գիշեր։ Բոլորը՝ ինձնից սկսած մինչև վերջին զինվորը, չէին քնում։ «Ավ․» ◆ Այն խեղճ աղջիկն էլ․․․ օր ու գիշեր մեկ արած՝ հալած մոմ է դարձել ասեղի ծայրին շատ մտիկ տալուց։ Ն-Դ
2. (գիշերն) անդուլ աշխատել, օրնիբուն ջանք թափել ◆ Այսպես գիշերը ցերեկին էր խառնում, կարում էր, հա կարում, որ մինուճարի կարիքները հոգար։ ◆ Շատ չանցած չարաչար աշխատանքով, գիշերը ցերեկին խառնելով․․․ հաստատած էր իր սեփական գործը։ Վահրամ Մավյան ◆ Եթե գիտնայիր որ ես ի՜նչ կրակներու մեջ էի, գիշերս ցորեկիս խառնած՝ ի՜նչ աշխատության մեջ։ (Ռուբեն Սևակ) ◆ Ոստիկանությունը գիշեր ցերեկ իրար խառնած ոճրագործները կը փնտռեր։ «Զարթոնք» ◆ Ու շաբաթը յոթը օր, հորը ոտքերը դադար չէին ճանչնար [ճանչ-նար], մինչ մորը ձեռքերը գիշերները կը խառնեին ցերեկներուն։ Արմեն Դարյան ◆ Աղավնի հանըմը ցերեկը գիշերին կը խառներ, և ամիս մը ետք Գևորգ կ'ունենար իր ըղձացած գիրքը։ Լևոն Բաշալյան ◆ Զինյալ ուժերու արդիական փորձերու ենթարկվիլը, գիշերը ցերեկին միացնելու գնով, հասնելու համար արդիական զենքերը գործածելու կարողության։ «Զարթոնք» ◆ Վերևում պապակ հողերը ջրի են սպասում, և․․․ գիշերը պիտի ցերեկ անել՝ կայանը շուտ ավարտելու համար։ (Վախթանգ Անանյան) ◆ Իր անձն իսկ կը մոռնա, գրեթե գիշերը ցերեկ կ'ընե, մարդ կը փնտռե։ Մամ․ ◆ Արամն անչափ զբաղված է, գիշեր֊ցերեկ է անում, որ պետական քննությունները հաջող հանձնի։ Գրիգոր Բալասանյան ◆ Գիշեր ու ցերեկ մեկ ենք արել, որ նոր ուսումնական տարին նոր շենքում սկսենք։ «Գրական թերթ» ◆ Այն խեղճ աղջիկն էլ․․․ օր ու գիշեր մեկ արած՝ հալած մոմ է դարձել ասեղի ծայրին շատ մտիկ տալուց։ Ն-Դ ◆ Ատիկա գտնողն էր հեղափոխականը, որը օրը գիշեր էր ըրած։ Հակոբ Օշական ◆ Գիշերը ցերեկ դարձրած՝ աշխատում են, պլան կատարում, շենքեր կառուցում։ «ՍՀ» ◆ - Գիշերը ցերեկ շինած՝ գլուխս թաղել էի մազութի հորի մեջ, թե մի քանի կոպեկ ետ գցեմ, տուն ղարկեմ։ Մաթևոս Դարբինյան

Աղբյուրներ

1. Պետրոս Սարգսի Բեդիրյան, Հայերեն դարձվածքների ընդարձակ բացատրական բառարան, Երևան, «Երևանի Պետական Համալսարանի Հրատարակչություն», 2011։