լեզուն իրեն քաշել

Վիքիբառարան-ից

Հայերեն դարձվածք

  1. Լռել, ձայնը կտրել ◆ -Իսկ եթե դու մեզ դավաճան դուրս կբերես՝ քթիդ կհասցնենք, չենք խնայի։Խոսողը լեզուն իրեն քաշեց։ Դերենիկ Դեմիրճյան ◆ -Լիզուս ինձ քաշած վեր ընկած էի էս ջաղացումը, եկաք խոսացրիք։ Մաթևոս Դարբինյան ◆ -Էս նեղությանս ատենը, լեզուդ կարճ կընես, թե չէ…Կինը լեզուն իրեն քաշեց։ (Հանդէս ամսօրեայ) ◆ Մոտիկ ու հեռավոր ձայները կը կտրեին ա՛լ, գորտերն ու ծղրիդներն անգամ լեզունին իրենց կը քաշեին։ Վահե Հայկ ◆ -Կսատկեք, մեզանից մարդահաշիվ կպահանջեն։-Իսկ որ լեզուդ քեզ պահես, չի լինի։ Դերենիկ Դեմիրճյան ◆ -Տո՛, իսանի՛ [«մարդո՛ւ»] խարաբ, ի՞նչ էլավ քեզ․ մի քիչ որ համբերես, լիզուդ քեզ անես, լավ չըլի՞լ։ (Խաչատուր Աբովյան)
  2. Իր խոսքը զսպել ◆ Մանավանդ այդ պարծենկոտ Զարոն լեզուն իրեն կքաշի և էլ չի ծաղրի իր ուղղագրական սխալները։ Ստեփան Զորյան ◆ Անիկա քաշեց լեզուն իր պուկին, ուրիշին ցավն խնդացող մեկու մը չնմանելւու համար։ Հակոբ Օշական
  3. Չդիմադարձել․ չհակառակվել (խոսքով) ◆ Կին ըսածդ լեզուն ներս քաշել պետք է գիտնա։ Պողոս Գյուբելյան ◆ Որևէ պատճառով նրանք դիպչում էին իրար և կինը լեզուն իրեն չէր պահում։ Ն-Դ ◆ -Ի՞նչ ես բերնիդ կապը կտրել ու լեզուդ քեզ չես անում։ (Խաչատուր Աբովյան)
  4. չխոսել, իրեն խոնարհ՝ հնազանդ պահել ◆ Սրա-նրա տանը հացփող նոքար են եղել, լեզուներն իրենց քաշած, հիմի կարգադրություններ են անում։ Մաթևոս Դարբինյան ◆ -Ես իմ մալ ու դոլվաթովը [«ունեցվածքով»] պտի լիզուս ինձ քաշեմ ու ծակը մտնեմ, ինչ ա՝ թե իմ մարդս գեղի մեջին քեթխուդություն չի կարողանում անել։
  5. գաղտնիքը դուրս չտալ, լեզուն փակ պահել ◆ Ամերիկացիներին առաջարկեցին ցանկացած այլ բնակավայրում նկարահանումներ կատարել, եթե նրանք խոստանան լեզուներն իրենց քաշել։ Եր ◆ Օրերս բերանից թռցրեց մի բան, որի մասին նա…պետք է լեզուն իրենց քաշած պահեր։ Եր

Աղբյուրներ[խմբագրել]

  1. Պետրոս Սարգսի Բեդիրյան, Հայերեն դարձվածքների ընդարձակ բացատրական բառարան, Երևան, «Երևանի Պետական Համալսարանի Հրատարակչություն», 2011։