ծակը մտնել

Հայերեն դարձվածք

1. թաքնվել.մի տեղ ծվարել◆ - Տեղ կա՝ ասլան կդառնան, առաջ կկտրեն, տեղ կա՝ մկան պես, պոչն իրար կքաշեն, ծակը կմտնեն: (Պերճ Պռոշյան) ◆ -Որ ծակն ալ մտած ըլլան պիտի հանեմ սա գարշելիները։ Հակոբ Պարոնյան ◆ -Պահելու ի՞նչ պետք կար... ծակը մտած աշխատելեդ հայտնի էր նպատակդ։ Սոնա Թնկըրյան ◆ Երբ բարկացած գոռում է... Տիրանը... ծակերն է մտնում: (Միքայել Նալբանդյան)
2. փախչել-թաքնվել◆ -Միհրալի խանն ահից ծակն է մտել: Սոնա Թնկըրյան ◆ -Ուր կորար, ընչի մկան նման գլխներն առան, ծակը մտան տերտերն ու տանուտերը։ (Պերճ Պռոշյան) ◆ -Ընկեր մայոր... էս խեղճերը վախից ծակերն են մտել, դուրս չեն գալիս։ Գրիգոր Բալասանյան ◆ -Ի՞նչ եք մկների նման ծակուծուկ մտնել... Դո′ւրս եկեք։ «Եր.» ◆ Բայց երբ լույս ընկավ Անգեղ Տորք հսկան, Ավազակները ծակըծուկ մտան: (Ղազարոս Աղայան) ◆ Հարձակում կը գործեին բայց դանակի առջև մուկի պես ծակե ծակ կը մտնեին: Հակոբ Օշական ◆ Ու էլ չէր գիդի վուր մեկ ծակը մտնի էս ազազիլներեմեն։ Գաբրիել Սունդուկյան ◆ Մեկալները որ սատանի ծակը ինկեր էին: Կը փնտռեր։ (Արփիար Արփիարյան)
3. պահ մտնել, իրեն ցույց չտալ◆ Մեր օրերում քաղքենիությունը անցել է խոր ընդհատակ, մկան նման ծակը մտնել և դժվարությամբ է հայտնաբերվում։ ՆԱդ. ◆ -Տներից բուրող կերակրի հոտը բռնել էր ողջ քաղաքը։ Իսկ չքավորությունը ծակերն է մտել: Դերենիկ Դեմիրճյան
4. կորչել, անհետանալ ◆ -Նորեն ո՞ր ծակը մտավ աս աղջիկը... Արթաքին սիրողը ասանկ կընե։ Շահան Շահնուր

Աղբյուրներ

1. Պետրոս Սարգսի Բեդիրյան, Հայերեն դարձվածքների ընդարձակ բացատրական բառարան, Երևան, «Երևանի Պետական Համալսարանի Հրատարակչություն», 2011։