կոկորդից բռնել

Վիքիբառարան-ից
Jump to navigation Jump to search

Հայերեն դարձվածք

  1. նեղություն տալ, նեղը լծել ◆ Հետզհետե պահանջ զգաց պատասխան գտնելու այդ հարցին, որ բռնել էր իր կոկորդից ու բաց չէր թողնում: Սերո Խանզադյան ◆ համեմատության համար՝ Կրանը բռնել է նրա (քաղաքի) կոկորդից՝ Նարիղալայից մինչև Հավլաբար: (Մ․ Սարգսյան)
  2. ճնշել, ճնշում գործադրել ◆ Այդ ո՛ր քաղաքում և ով է ում կոկորդից բռնել, ինչի համար է բռնել, մեղավորն ով է եղել, կոկորդից բռնողը պատժվե՞լ է: (Հրանտ Մաթևոսյան) ◆ Քել [«ճաղատ»] Նիկողոսներ և քյոմյուրճի [քյոմյուրջի, «ածխագործ»] Ավագներ բռներ էին մեր կոկորդներեն և մեր արյունը կը ծծեին: Զապել Եսայան ◆ Հացի և ապահովության սարսափը բռնած կոկորդես խեղդամահ պիտի ընե զիս: Գևորգ Աճեմյան ◆ - Բկիցս բռնել, բայց չես թողնում: Ես էլ մարդ եմ, չէ՞: Պերճ Զեյթունցյան
  3. ստիպել ◆ Ո՞վ է բռնել մեր կոկորդից, / Որ ձեռք քաշենք Հայկ ու Վարդից, / Անուններից մեր ազգորոշ: Հովհաննես Շիրազ ◆ - Թո՞ւրք եմ, ինչ է, որ եկել եմ բռնելու ձեր կոկորդից, թե ուզեք-չուզեք՝ պետք է երկրպագություն տաք Մահմեդին: Ն-Դ ◆ Հու [«ու»] քյինացել են մարթին պկան փռնալ, թա «Եկ քյինանք երկրիս տարին [«տիրոջ»] կոշտը»: Պըել ախպորը...
  4. հասկացնել (փխբ․), պատժել, հախից գալ ◆ Կարծես Օթելլոյի ամենադրամատիկ տեղը խոսքը մոռացել է և վազում է կորցրած հուշարարի կոկորդից բռնելու: Դերենիկ Դեմիրճյան
  5. ազդելով՝ կապել-կաշկանդել ◆ Հանդիսատեսը սիրում է, որ դերասանը բեմ մտնելիս հանկարծական և անսպասելի արագությամբ բռնի իր կոկորդից և իրեն ենթարկի, եթե դերասանը չկարողացավ այդ անել...ապա ինքը՝ հանդիսատեսը կբռնի դերասանի կոկորդից: (Վահրամ Փափազյան)
  6. (հզվդ․) հիմնականից, գլխավորից կառչել ◆ Ես ցանկանում եմ...սկսել Երևանում ֆուտբոլային գործի կազմակերպումից, քանի որ...միայն այդպես է հնարավոր, ինչպես ասում են, կոկորդից բռնել: ՀՖ

Աղբյուրներ[խմբագրել]

  1. Պետրոս Սարգսի Բեդիրյան, Հայերեն դարձվածքների ընդարձակ բացատրական բառարան, Երևան, «Երևանի Պետական Համալսարանի Հրատարակչություն», 2011։