(ժղ․) ավելի արծարծել, ավելի բորբոքել (զայրույթը, վիշտը և այլն) ◆Թևքերը քշտած նետվել բորբոքվող վեճի մեջ ու դեռ «կրակի վրա յուղ էր լցնում»: Երեկոյան Երևան◆- Քուզենս այդ ձեր ըսած մեծ հետաքրքրությամբ չէ որ կը հետաքրքրվի... - կցեց Մինե՝ տեսակ կը դրդող - գրգռող շեշտով։ Կրակի վրա յուղ լցնել կ'ուզեր։ Լևոն Շանթ◆Ու փրթեց մի վեճ, որն եկավ իսկապես յուղ լցնելու Անդրեևի հռչակի կրակին: Ստեփան Զորյան◆-Մարթա՛, տասն անգամ խնդրել եմ, որ կրակի մեջ յուղ չածես, վատ բան է։ ԱլՇ◆Նրա մասին գյուղի մեջ տարածված ասուտեսը մազի չեփ չէր պաղեցնում այն կրակը, որով բորբոքվել էր նրա սիրտը. ընդհակառակն՝ ինչպես կասեն՝ կրակի վրա յուղ էր ավելացնում: (Ղազարոս Աղայան)◆Իսկ Հեր Սաքոն լուրերն ալ կրակի վրա յուղ կը թափեին: Կ'ըսեր թե Պոլսեն թուրք մասնագետներ կու գան, բերելով Պերպերյանին լուսանկարը։ ԱրչՇ◆Բայց զգում էր, որ խոսքն ավելորդ էր, դա կլիներ յուղ՝ բռնկած կրակին: Ստեփան Զորյան◆Բավական չէ իմ կրակս, անոր վրա եղ կը թափես և հեռուեն կը ծիծաղիս։ (Մաթևոս Մամուրյան)◆Եվ մարզպանը պիտի գիտնար անոնց կրակին յուղ հայթայթել: ՀրԱրմ◆Կրակի վրա փուշ մի՛ գցիր: Թեղենք◆Ինձ դիվանա մեջլում շինից, յիղ դըրից իմ կրակին: (Սայաթ-Նովա)◆Մեծերին հուզող կրքերը շոյում, / Ձեթ են լցնում կրակի վրա: (Շիրվանզադե)◆Եվ միայն ճշմարտությամբ...կարելի էր նավթ չլցնել ամեն ինչ լափլիզող կրակին, նպաստել նրա մարմանը։ «Խորհրդային Ղարաբաղ»◆- Տյու էլ կրակի վրա բենզին ես լցնըմ: Իջևան
