ձեռքն անցնել

Վիքիբառարան-ից
Jump to navigation Jump to search

Հայերեն դարձվածք

  1. (արևմտհ․) ձեռքում հայտնվել, ձեռքն ընկնել ◆ - Նույնն է ձեռքդ անցնի ռազմական մի նոր և հզոր գործիք: Պերճ Զեյթունցյան ◆ - Ես հենց դրա համար աշխատեցի, որ այդ թղթերը Մարգարիտի ձեռքն անցնեին: ԱլՇ ◆ Ու ահա ձեռքս կ’անցնի Հասմիկին հուշատետրը: Հովհաննես Թումանյան ◆ Այնտեղ պահած էր իր մանկության տարիներեն ձեռքը անցած իրերը: Զապել Եսայան
  2. իր մոտ՝ ձեռքում գտնվել ◆ Մեր ձեռքն անցած արվեստի գործերի հավաքածուներից արդեն ծանոթ էին: Անթոսյան
  3. ստանալ, ունենալ ◆ - Այսքան տարիներե ի վեր ո՛չ թուղթի նայեր ենք, ո՛չ ալ գրի, տեսնենք ըսի, ի՛նչ կ’անցնի ձեռքս: Վահե Հայկ ◆ - Իսկ եթե ճամբան գլխուս փորձանք մը բերես, այն ատեն միայն չորս ոսկի կ’անցնի ձեռքդ: Երվանդ Օտյան ◆ - Էյեր քիրայի [«եթե վարձու»] տանք նե [«եթե»], քիչ մը փարա կասնի ծառվընիս: Եր. ◆ Տակավին ձեռք չէ անցած այդ թանկագին առիթը: «Ավանգարդ»
  4. վաստակել ◆ «Մեկուն մեկալին գիրերը կը գրեմ երբեմն երբեմն, ձեռքս քանի մը ղուրուշ կ’անցնի»: Լևոն Բաշալյան ◆ Գիշերը կ’աշխատիք ցերեկը կ’աշխատիք ... քառսուն փարա չունիք, ձեռքներիդ չ’անցնիր [չ’անցնիր: Մնձ.
  5. ճարել ◆ Կարդում եմ ինչ որ ձեռքս է անցնում: «Ջահ»
  6. տիրանալ ◆ Պետական վարչական ապարատը մեր ձեռքն անցնելով, իրենց իշխանությունն անխնա շահագործման վրա հիմնող հասարակական ուժերի ձեռքից դուրս եկավ մի ուժեղ զենք: Ալեքսանդր Բեկզադյան ◆ Տարբեր ենթադրություններ էին արվում ... այն մասին, թե ի՛նչ հիմնարկներ են անցել նրա ձեռքը: «Ավանգարդ» ◆ Ում ձեռն իրավունք էր անցնում ... այդ արտոնությունից շահվել էր ուզում: (Պերճ Պռոշյան)
  7. գրավվել ◆ Այն ժամանակ բոլոր պետական ամրոցները թշնամու ձեռը կանցնեն: (Մուրացան) ◆ Երևանի երկիրը ռուսաց ձեռքն անցելը ... նա վերնային առանձին շնորհք և խնամք էր ճանաչում: (Պերճ Պռոշյան)
  8. վիճակվել, բաժին ընկնել ◆ Ալիմյան առևտրական գործերի ղեկը Սմբատի ձեռքն է անցնում: ԱլՇ
  9. բռնվել ◆ Ձեռքն անցներ, բզիկ բզիկ աղար պիտի անոր միսերը: Օշ. ◆ - Ա՛խ, մեյ մը ծառքս անցնի՝ պիտի խխտեմ: Եր.

Աղբյուրներ[խմբագրել]

  1. Պետրոս Սարգսի Բեդիրյան, Հայերեն դարձվածքների ընդարձակ բացատրական բառարան, Երևան, «Երևանի Պետական Համալսարանի Հրատարակչություն», 2011։