վերևից նայել

Վիքիբառարան-ից

Հայերեն դարձվածք

  1. ((խսկց․) վերևեն մտիկ անել, (բրբ․) հավայեն [«օդից»] աշել, (արևմտհ․) վերեն դիտել մեկի՝ մի բանի նկատմամբ գոռոզ դիրք բռնել, ամբարտավանել ◆ -Վերևից են նայում մեզ... ստորնագույն են համարում, գոռոզ ազգ է, գոռոզ ոգի։ Դերենիկ Դեմիրճյան ◆ Զարմանում էր, թե ինչպես համաձայնից դառնալ մի մարդու կին... որի նմաններին նայել էր վերից, ինչպես վայել էր իր նման ազնվազարմ ու հպարտ մեկին։ Սերո Խանզադյան ◆ Կարենալով վերեն, շա՜տ վերեն նայիլ այնպիսի մարդոց վրա, որոնց մինչև այն ատեն վարեն, շատ վարեն նայիլ տրված էր իրեն։ Եր ◆ Այս տիպի սնոպը [սնոբը, «քաղքենին»] կ՚աշխատի վերեն դիտել իր շրջապատը և չհարաբերիլ «խեղճ հասարակության» հետ։ Պերճ Թերզյան ◆ -Ինձ հետ մեծամտորեն էր խոսում, ինձ վրա բարձրից էր նայում: «Ավանգարդ» ◆ -Կ'ուզեի գիտնամ ինչ տարբերություն կամ քու և իմ մեջս, որ այս աստիճան բարձրեն կը նայիս վրաս։ Լևոն Շանթ ◆ Հրեն Սերոբը ո՞նց է ոտը ձգում, կառավարչի հետ հավասար է ժաժ գալիս, Մուկուչին էլ վերևից է մտիկ անում: ՄԱր ◆ -Երբ այդքան զարգացար, որ հիմա էլ հավայեն կաշես: Գանթիադի
  2. մեկին՝ մի բանի արհամարհանքով վերաբերվել ◆ Բանինն ավելի շատ զզվում է իր ժողովրդից, արհամարհում, վերևից նայում: Երեկոյան Երևան ◆ Կոտրվեց շնիկի գոռոզությունը, մարդկանց ու կենդանիներին նա այլևս չէր նայում արհամարհանքով, վերևից: (Վախթանգ Անանյան) ◆ Ուզեցին նորեն ֆրանսական ձևերը ընդօրինակել և Հայ արժեքներուն վրա վերեն նայիլ: Արշակ Չոպանյան ◆ Սկզբում համադասարանցիները բարձրից էին նայում ռեփի սպիտակամորթ կատարողին։ «Եթեր»
  3. պատշաճ լրջությամբ չվերաբերվել, խորքերը չգնալ ◆ Հոգնած քաղքենու նման վերևից նայեց իր ժամանակին, կենցաղավարական օրենքներով համեմեց իր սլաքները։ (Վահրամ Փափազյան) ◆ Կազմակերպական աշխատանքներուն վերեն նայող և կուսակցական առօրյան արհամարհող Հրոն չկար։ Անդրանիկ Ծառուկյան ◆ Հոն իր հակազդեցությունը զուսպ է... վերեն կը նայի հարցերուն։ Գրիգոր Շահինեան
  4. վեր կանգնել, չմանրանալ, մեծահոգություն հանդես բերել ◆ Նայում եմ ես բարձրից, բարձրից, բարձունքներից / Ու չեմ տեսնում մանրը, գորշը, կոշտը՝ ցածում։ Սիլվա Կապուտիկյան ◆ Ապրեցար փիլիսոփայի մը պես, վերեն նայեցար մարդկային փոքրոգություհներուն, ներող եղար միշտ։ «Զարթոնք» ◆ Այլևս մարդոց և իրերուն հանդեպ կրնա նայիլ հեռուեն ու բարձրեն, խաղաղ ժպիտով կամ փիլիսոփային հեգնանքովը։ Անդրանիկ Ծառուկյան

Աղբյուրներ[խմբագրել]

  1. Պետրոս Սարգսի Բեդիրյան, Հայերեն դարձվածքների ընդարձակ բացատրական բառարան, Երևան, «Երևանի Պետական Համալսարանի Հրատարակչություն», 2011։