Կաղապար:Օրվա բառ/փետրվարի 11, 2016 թ.
տրորել բայ
Հայերեն
վանկեր՝ տ(ը)•րո•րել
Բայ
- ձեռքը մի բանի վրա շարժելով շփել, մաժել, մերսել (հիվանդ՝ ցավոտ տեղը) ◆ Սկսեցին մածնով տրորել ուռած դեմքը, մարմինը, վիզը: Սերո Խանզադյան
- մատների մեջ ճմռել, այս ու այն կողմ տանելով՝ սեղմելով փափկացնել ◆ Կավը մոմը տրորեց:
- ծալծլել, ճխլտել, ճմռթել ◆ Նա տրորեց գլխարկի եզրը: (Ակսել Բակունց)
- ճզմել, ճմռել, ճնշելով հյութը քամել ◆ Խաղող տրորել:
- ձեռքով սեղմելով լվանալ ◆ Լվացքը տրորել:
- ոտնատակ տալ, կոխոտել, կոխոտելով փչացնել ◆ Ու անգութը բաղս մտավ, ա՜խ, տրորեց ծաղկունքս: (Ազատ Վշտունի)
- ոտքի տակ գցել, ոտքը վրան դնել ◆ Վահանը մի տաս հոգու հետ բախվեց և նույնքան հոգու ոտքերը տրորեց: (Անահիտ Սահինյան)
- (փխբ․) ճնշել, հարստահարել, կեղեքել ◆ Թշնամին ավելի սաստիկ կերպով սկսեց տրորել մեզ: (Րաֆֆի)
- (փխբ․) ոտնատակ տալ, անարգել ◆ Գնա՛, քարավան, ներբաններիդ տակ տրորի՛ր, կոխի՛ր օրենք, իրավունք:
- կոխոտելով ջախջախել, ջնջխել ◆ Ոտքերով տրորեց օձի գլուխը:
- գալարել, ճմլել ◆ Ցավը տրորեց սիրտը:
Հոմանիշներ
- մաժել, մերսել, շփել, մաժմժել, (հզվդ․) մարսել, մարձել, շփշփել
- ճմռել, ճմռոտել
- ծալծլել, ճխլտել, ճմռթել
- ճզմել, ճմլել, ճմռել, ճխմել, ճլխել
- լվանալ
- կոխոտել, կոխկռտել, (հզվդ․)՝ տրորկել, ոտնել, ընդոտնել, ոտնատակել, զգետնել, շմշկել, (գվռ․) կոխկռճել, կոխկռճտել, կոխճռտել, կոխրճել, կեճռել, կխչորել, աճռել, աճռկել, աճռտել, աճռտկել, աճռթել, լոսել, լղճորել, լղճել, լմել, լմլմել, լմլմորել, լոմլոմել, լմլել, լամլմել, լոմլտել, լմշտել, լղզել, հաղաղել, հղաղել, հարհարել, ճխլտել, ճխլխորել ճմոռել, ճմռթել, ճմռթկել, ճմռթորել, ճմռտորել, ճմռտոտել, ճմռտել, ճմրթել, ճվռթել, ճվռթկել, ճպլտորել, ճխլտորել, ճնկլխորդել, ավրշտկել, շալմլկել, պճռթքել, ջաղբել, ոտնակոխ անել, ոտնատակ տալ, ոտի տակ տալ, տրորս տալ, տրորտակ տալ, տրորս անել, տրոր-տրոր անել, կրկնակոխ անել, մթիլ դարձնել
- շաղախել, հունցել
- տե՛ս ճնշել, հարստահարել
- տե՛ս անարգել
- ջախջախել, ջնջխել
- տե՛ս գալարել, ճմլել